謝君豪 就在腳下

發信人: yilingkoo.bbs@cia.hinet.net (只有為你～大蝦哥哥), 看板: HK-Drama
標  題: 謝君豪 就在腳下
發信站: 中央情報局 (Tue Sep 16 09:38:15 2003)

由舞台跳到大銀幕，謝君豪未習慣放下藝術家身分，已取得金馬影帝名銜，卻為了搞舞台劇，推掉源源不絕的片約，但在話劇團成為「飛」人物，開始感到壓力，要整整一年時間才能拋開包袱。

這些年來他到大陸拍劇，隨著與來自五湖四海的人合作，接觸到不同人種，謝君豪眼界大開，不再活在象牙塔內，發覺人生大道理，原來一直踏實的在腳下。

＜採訪＞維她　＜攝影＞容子堂

謝君豪近兩年共拍了五部國產劇，大部分時間不在香港，他又不會自我宣傳，要不是之前拍過亞視劇集，最近又參與無線一部劇的演出，大家差點忘記他曾為港增光，憑《南海十三郎》榮獲台灣金馬影帝。這次面對面傾談，不知是否秋日的陽光耀眼得來清爽，感覺上他整個人都比以前開朗健談。

天外有天

「無論做野、演戲、人生，我係比以前睇開左好多，可能出去做野接觸人多D，依家我會覺得藝術唔係高高在上，而係好踏實咁D腳下，細個睇日劇《柔道龍虎榜》已經知道呢個道理，但道理同實踐係兩回事，要慢慢成長，體唔體會到就好個人。」

謝君豪承認曾有一段時間很熱愛藝術，對舞台劇有一番抱負，藝術家追求真善美，往往以為高人一等，所以藝術家都自高自大，但其實應該謙虛去觀察別人，便會發覺世界上還有很多高手，以他曾合作過的內地演員為例，有很多香港觀眾甚或他自己也不認識的演員，可能就是超級高手。

各有所長

「香港人自信心下跌，依家咁既時勢出去睇番，未必自己果套最標青，但發展咁多年，點都有自己。我地同內地演員演戲有乜唔同？點解人地要用你？見多左內地演員，就會諗到。」

他又以金庸小說《笑傲江湖》，華山分有氣宗與劍宗兩個支派作比喻，香港演員屬劍宗派，有想像力具浪漫感又快捷，內地演員則是氣宗派，需要一定時日的訓練作基礎，演技都很紮實，歷史感很重，所有其他華人地區的演員演歷史劇都不及他們，總之各有所長，不可妄自菲薄。」

總覺得當年他沒有好好把握做了影帝的機會，繼續在影圈發光發亮是一件很可惜的事情，他卻真的以平常心看這件事。「影帝係隨緣，第一我最鍾意係舞台，唔識度期，以為做唔到其他野，推左好多部戲；其次係我一向唔係爭取型，不過呢幾年都多D人搵我返大陸拍劇，依家每年都會保持住做一個舞台劇。」

因為醉心舞台劇，謝君豪失去很多名與利的機會，現在再給他作取捨，他的答案仍是肯定的：「都係揀舞台劇！」

太大壓力

「其實羅獎之後，我都唔知係乜，只係覺得突然有好多人圍住我影相，講D野又變得好重要咁上晒報紙，唔知點應付。」由一個媒體轉到另一個媒體，對演出電影、電視未有時間去適應之外，連原本對舞台劇有絕對把握的他，也突然感到壓力。

「由84年開始做舞台劇，我當時已經做到冇晒壓力，但突然間有好多人買飛入來係為左睇我，壓力係唔知自己可唔可以交代到，有左呢個諗法，我就唔可以好似以前咁享受，用平常心在最輕鬆D狀態下演出，直至有一次返大陸拍戲，已經係一年後既事，好辛苦，冰天雪地，幾晚通宵，咁樣反而突然間Click中，原來人生冇乜！」

「詩人」寶貝女

以前，謝君豪不愛跟傳媒談私人生活，現在他像大部分的父母一樣，提到兩歲半的寶貝女兒，任何事都美化得可以。

「呢兩年我有三分二時間大陸，好掛住屋企個小朋友，但佢對我幾好，有次佢係電話問我：『又幾時返來呀？做完野未呀？唉唉唉！』佢係度呻吟緊。」

說時，他是一臉溫馨甜絲絲，之後又說：「佢好有思想邏輯，D比喻用得好藝術，有次係屋企燃左好多蠟燭，佢一路睇住話：『蠟燭喊呀！』佢用喊來比喻D蠟滴落既一刻用得好好，詩人都係咁咋，勁過我呀！」

成報  http://www.singpao.com/20030916/gossip/445904.html